குழந்தைகளுக்கு ஏற்படும் தொற்றுநோய்கள்

by admin-blog-kh | December 31, 2025 5:27 am

தடுப்பூசி, கை கழுவுதல், பாதுகாப்பான உணவு மற்றும் நீர் – இந்த மூன்று அடிப்படை விஷயங்களில் கவனம் செலுத்தினாலே போதும்… இந்தியாவில் ஐந்து வயதுக்குட்பட்ட குழந்தைகளின் இறப்புக்கு முக்கிய காரணமான நிமோனியா, வயிற்றுப்போக்கு போன்ற நோய்களை எளிதாகத் தவிர்க்க முடியும்.

டாக்டர், என் குழந்தைக்கு அடிக்கடி சளி, காய்ச்சல் வருகிறது. ஒரு மாதம்கூட நோய் இல்லாமல் இருப்பதில்லை – குழந்தை நல மருத்துவர்களை சந்திக்கும் பெற்றோர்களின் பொதுவான கவலை இது. இந்தியாவில் ஆயிரம் குழந்தைகளில் 28 குழந்தைகள் ஐந்து வயதுக்குள் இறக்கின்றனர். இதற்கு முக்கிய காரணம் நிமோனியா[1] மற்றும் வயிற்றுப்போக்கு போன்ற தடுக்கக்கூடிய நோய்கள்தாம்.

வைரஸ் தொற்று vs பாக்டீரியா தொற்று – வேறுபாடு அறிவோம் 

பெற்றோர்கள் கண்டிப்பாக தெரிந்துகொள்ள வேண்டிய விஷயம் – எல்லா காய்ச்சலுக்கும் ஆன்டிபயாடிக் தேவையில்லை. பெரும்பாலான குழந்தைப்பருவ நோய்கள் வைரஸ் கிருமிகளால் வருகின்றன.

வைரஸ் தொற்று படிப்படியாக ஆரம்பிக்கும். மூக்கு ஒழுகுதல், இருமல், தொண்டை வலி, லேசான காய்ச்சல், உடல்வலி போன்ற பொதுவான அறிகுறிகள் இருக்கும். குழந்தை சற்று அசௌகரியமாக இருந்தாலும் ஓரளவு சுறுசுறுப்பாகவே இருப்பார்கள். 3 முதல் 7 நாட்களில் தானாகவே குணமாகிவிடும்.

பாக்டீரியா தொற்று திடீரென்று அதிக காய்ச்சலுடன் ஆரம்பிக்கும். காது வலியுடன் சீழ் வடிதல், மஞ்சள் அல்லது பச்சை நிற கபம் கொண்ட இருமல் போன்ற குறிப்பிட்ட இடத்தில் தொற்றின் அறிகுறிகள் தென்படும். குழந்தை படிப்படியாக மிகவும் சோர்வடைந்து மந்தமாக இருப்பார்கள். இதற்கு மருத்துவரின் பரிந்துரையின்படி ஆன்டிபயாடிக் அவசியம்.

எச்சரிக்கை அறிகுறிகள் – உடனடியாக மருத்துவமனைக்கு! 

பின்வரும் அறிகுறிகள் இருந்தால் உடனடியாக மருத்துவரை அணுக வேண்டும்.

• மூச்சுத் திணறல்[3]
• உணவு மற்றும் திரவம் எடுத்துக்கொள்ள மறுப்பது
• சிறுநீர் கணிசமாகக் குறைவது
• தொடர்ச்சியான வாந்தி அல்லது வயிற்றுப்போக்கு
• மிக அதிக காய்ச்சல்
• காய்ச்சலுடன் தோலில் சொறி
• அதீத சோர்வு அல்லது மந்தநிலை
• வலிப்பு[4]

இரண்டு மாதத்துக்கும் குறைவான குழந்தைகளுக்கு மேற்கண்ட அறிகுறிகளில் ஏதேனும் இருந்தால் உடனடியாக மருத்துவமனை செல்ல வேண்டும்.

தடுப்பூசி – உயிர்காக்கும் கவசம் 

இந்திய அரசின் தேசிய நோய்த்தடுப்பு அட்டவணையை (National Immunisation Schedule) அவசியம் பின்பற்ற வேண்டும். தட்டம்மை, போலியோ, காக்குவான் இருமல், டெட்டனஸ், சில வகை நிமோனியா, ரோட்டாவைரஸ் வயிற்றுப்போக்கு போன்ற உயிருக்கு ஆபத்தான நோய்களில் இருந்து தடுப்பூசிகள் பாதுகாக்கின்றன.

கூடுதலாக ஃப்ளூ தடுப்பூசி[5], டைபாய்டு கான்ஜுகேட் தடுப்பூசி, HPV தடுப்பூசி பற்றி உங்கள் குழந்தை மருத்துவரிடம் ஆலோசிக்கலாம்.

வாழ்நாள் பாதுகாப்பு அளிக்கும் சுகாதாரப் பழக்கங்கள் 

1.5 முதல் 2 வயதில் இருந்தே சுகாதார பழக்கங்களைக் கற்றுத்தர வேண்டும். முக்கியமாக…

• சாப்பிடும் முன், கழிவறை சென்ற பின், வெளியில் விளையாடிய பின் சோப்பு போட்டு கை கழுவுதல்
• இருமும்போதும் தும்மும்போதும் முழங்கையால் வாயை மூடுதல்
• கீழே விழுந்த உணவைச் சாப்பிடாமல் இருத்தல்
• காய்ச்சி ஆறவைத்த அல்லது வடிகட்டிய நீர் குடித்தல்

வீட்டில் நோய் பரவாமல் தடுக்க… 

ஒரு குழந்தைக்கு நோய் வந்தால்:

• முடிந்தால் தனி அறையில், நல்ல காற்றோட்டத்துடன் ஓய்வெடுக்க வைக்கவும்
• தனிப் பாத்திரங்கள், துண்டுகள், படுக்கை விரிப்புகள் பயன்படுத்தவும்
• பராமரிப்பவர் மாஸ்க் அணிந்து, அடிக்கடி கை கழுவ வேண்டும்

ஊட்டச்சத்தும் நோய் எதிர்ப்பு சக்தியும்

தாய்ப்பால் தாயின் நோய் எதிர்ப்பு சக்தியை குழந்தைக்கு அளிக்கிறது[6]. ஃபார்முலா பால் குடிக்கும் குழந்தைகளுக்கு தொற்றுநோய் அபாயம் அதிகம். ஆறு மாதத்துக்குப் பிறகு பழங்கள், காய்கறிகள், தானியங்கள், பால், முட்டை கொண்ட சமச்சீர் உணவு அவசியம்.

ஆன்டிபயாடிக் எதிர்ப்பு  

தேவையற்ற ஆன்டிபயாடிக் பயன்பாடு உடலில் உள்ள நல்ல பாக்டீரியாக்களை அழித்து, மருந்து எதிர்ப்பு கொண்ட தீய பாக்டீரியாக்களை வளர்க்கிறது. எதிர்காலத்தில் உண்மையான பாக்டீரியா தொற்று வரும்போது மருந்துகள் வேலை செய்யாது.

சர்வதேச தொற்று தடுப்பு வாரத்தின் முக்கிய செய்தி 

தடுப்பூசி போடுங்கள், கை சுகாதாரத்தைக் கடைபிடியுங்கள், பாதுகாப்பான உணவும் நீரும் உறுதி செய்யுங்கள். இந்த மூன்று எளிய விஷயங்களே குழந்தைகளின் ஆரோக்கியமான எதிர்காலத்துக்கு அடித்தளம்!

தமிழ்நாட்டில் பொதுவான பருவகால நோய்கள்

• மழை மற்றும் மழைக்குப் பிந்தைய காலத்தில் டெங்கு காய்ச்சல்[7], டைபாய்டு காய்ச்சல், ஸ்க்ரப் டைபஸ் (உண்ணி கடி காய்ச்சல்) அதிகரிக்கும்.
• சில பகுதிகளில் ஜப்பானிய மூளைக்காய்ச்சலும் காணப்படுகிறது.
• ரைனோவைரஸ், RSV, இன்ஃப்ளூயன்ஸா[8] (H3N2 உட்பட) போன்ற வைரஸ்களால் சளி, இருமல் பரவுகிறது.
• கொசுவலை, கொசு விரட்டி பயன்படுத்துதல், தேங்கி நிற்கும் நீரை அகற்றுதல் அவசியம்.

 

Dr. ஆர். முத்துவேல், [9]MBBS, MD, DM (Paediatric Critical care[10])
குழந்தைகள் தீவிர சிகிச்சை நிபுணர்
காவேரி மருத்துவமனை
திருச்சி – கண்டோன்மென்ட்[11]

 

Kauvery Hospital is globally known for its multidisciplinary services at all its Centers of Excellence, and for its comprehensive, Avant-Grade technology, especially in diagnostics and remedial care in heart diseases, transplantation, vascular and neurosciences medicine. Located in the heart of Trichy (Tennur, Royal Road and Alexandria Road (Cantonment), Chennai (Alwarpet, Radial Road & Vadapalani), Hosur, Salem, Tirunelveli and Bengaluru, the hospital also renders adult and paediatric trauma care.

Chennai Alwarpet – 044 4000 6000 • Chennai Radial Road – 044 6111 6111 • Chennai Vadapalani – 044 4000 6000 • Trichy – Cantonment – 0431 4077777 • Trichy – Heartcity – 0431 4077777 • Trichy – Tennur – 0431 4022555 • Maa Kauvery Trichy – 0431 4077777 • Kauvery Cancer Institute, Trichy – 0431 4077777 • Hosur – 04344 272727 • Salem – 0427 2677777 • Tirunelveli – 0462 4006000 • Bengaluru – 080 6801 68011

Source URL: https://www.kauveryhospital.com/blog/tamil-articles/infectious-diseases-in-children/

---