சர்க்கரை நார்மல்தான்… ஆனாலும், உஷார்!

by admin-blog-kh | July 4, 2026 5:14 am

ரத்தச் சர்க்கரை சாதாரணமாகத் தோன்றினாலும், அதைக் கட்டுக்குள் வைக்க உங்கள் கணையம் அதிக இன்சுலினைச் சுரந்து ஓய்வின்றி உழைத்துக்கொண்டிருக்கலாம்[1]. இதுவே நீரிழிவுக்கு முன்னோடி எச்சரிக்கை. சரியான நேரத்தில் கண்டறிந்தால், எளிய வாழ்க்கைமுறை மாற்றங்களால் இதை முழுமையாக மாற்றியமைக்க முடியும்.

ரத்தப் பரிசோதனை செய்கிறீர்கள். சர்க்கரை அளவு ‘நார்மல்’ என்று வருகிறது. நிம்மதிப் பெருமூச்சு விடுகிறீர்கள். ஆனால், அந்தச் சாதாரண அளவுக்குப் பின்னால் ஓர் அமைதியான பிரச்னை ஒளிந்திருக்கலாம். அதன் பெயர்தான் ஹைப்பர் இன்சுலினீமியா. நாம் உணவு உண்ட பிறகு ரத்தத்தில் உயரும் குளுக்கோஸை செல்களுக்குள் கொண்டு செல்ல, கணையம் இன்சுலின் என்கிற ஹார்மோனைச் சுரக்கிறது. தேவையைவிட அதிகமான இன்சுலின் நீண்ட காலம் ரத்தத்தில் நிலைத்திருப்பதையே ‘ஹைப்பர் இன்சுலினீமியா’ என்கிறோம். இது பெரும்பாலும் இன்சுலின் எதிர்ப்பின் ஆரம்ப எச்சரிக்கை. எனவே, சர்க்கரை அளவு மட்டும் பார்த்து நிம்மதியடைவது போதாது.

ஏன் இப்படி நிகழ்கிறது? 

உடல் செல்கள் இன்சுலினுக்குச் சரியாகப் பதிலளிக்காதபோது, அதை ஈடுசெய்ய கணையம் இன்னும் அதிக இன்சுலினை உற்பத்தி செய்கிறது. வயிற்றுப் பகுதியில் கொழுப்பு சேர்தல், உடல் பருமன்[2], உடற்பயிற்சி இன்மை, சுத்திகரிக்கப்பட்ட மாவும் சர்க்கரையும் நிறைந்த உணவுகள், தூக்கக் குறைவு, மனஅழுத்தம், குடும்ப மரபு ஆகியவை முக்கியக் காரணிகள். பெண்களின் பாலிசிஸ்டிக் ஓவரி சிண்ட்ரோம் (PCOS)[3], கொழுப்புக் கல்லீரல்[4], தூக்கத்தில் மூச்சுத்திணறல், மற்றும் சில மருந்துகளும் இதனோடு தொடர்புடையவை. அரிதாக, கணையத்தில் உருவாகும் ‘இன்சுலினோமா’ எனும் கட்டியும் காரணமாக இருக்கலாம்.

தென்னிந்தியச் சமையலறையில்தான் இந்தப் பிரச்னை எளிதில் வளரும். அதிக அளவு வெள்ளை அரிசிச் சாதம், இட்லி, தோசை, பொங்கல், உப்புமா, பரோட்டா, மைதா உணவுகள், சர்க்கரை சேர்த்த தேநீர், இனிப்பு, பேக்கரிப் பண்டங்களை அடிக்கடி சாப்பிடும்போது இன்சுலின் தேவை உயர்கிறது. அரிசி அளவைக் குறைத்து, காய்கறி, பருப்பு, முட்டை, மீன், தயிர் ஆகியவற்றைச் சேர்த்துக்கொள்வது அந்தத் தேவையைக் கட்டுக்குள் வைக்கும். கார்போஹைட்ரேட்டைத் தனியாக உண்ணாமல், நார்ச்சத்துடனும் புரதத்துடனும் சேர்த்து உண்பது சிறந்தது.

Also Read: நடைப்பயிற்சியும் நீரிழிவும் உயர் ரத்த அழுத்தமும்[5]

ஆரம்பத்தில் எந்த அறிகுறியும் இல்லாமல் இருக்கலாம். படிப்படியாக இடுப்புப் பருமன், உணவுக்குப் பிறகு விரைவில் பசி, இனிப்புக்கான ஏக்கம், சோர்வு, கவனக் குறைவு போன்ற பிரச்னைகள் தோன்றும். கழுத்து, கக்கம், தொடை மடிப்புகளில் கருமையாகத் தடித்த தோல் தோன்றுவது ‘அகாந்தோசிஸ் நைக்ரிகன்ஸ்’ எனப்படும் முக்கிய அடையாளம். பெண்களுக்கு மாதவிடாய் முறைகேடு[6], முகப்பரு, அதிக முடி வளர்ச்சி, கருத்தரிப்புச் சிரமம் இருக்கலாம். அவ்வப்போது நடுக்கம், வியர்வை, திடீர்ப் பசி, மயக்கம் ஏற்பட்டால் அது குறைந்த சர்க்கரையின் அறிகுறியாக இருக்கலாம்… உடனடியாக மருத்துவரை அணுக வேண்டும். கவனிக்காமல் விட்டால் நாளடைவில் முன் நீரிழிவு, வகை 2 நீரிழிவு[7], உயர் ரத்த அழுத்தம்[8], இதய நோய் ஆகியவற்றின் அபாயம் உயரும். இந்தியாவில் 10 கோடிக்கும் அதிகமானோர் ஏற்கெனவே நீரிழிவால் பாதிக்கப்பட்டிருக்கும் நிலையில், இந்த முன் எச்சரிக்கையைப் புறக்கணிப்பது ஆபத்தானது.

ஒரே ஒரு பரிசோதனையால் இதைக் கண்டறிய முடியாது. இடுப்பளவு, உடல் எடை, ரத்த அழுத்தம், குடும்ப வரலாறு ஆகியவற்றுடன், வெறும் வயிற்றுச் சர்க்கரை, HbA1c[9], கொழுப்புச் சத்து, கல்லீரல் பரிசோதனைகள், தேவைக்கேற்பக் குளுக்கோஸ் சகிப்புத் தேர்வையும் சேர்த்தே மருத்துவர் முடிவுக்கு வருவார்.

நல்ல செய்தி என்னவென்றால், இது மாற்றக்கூடிய நிலை. உடல் எடையில் 5 முதல் 7 சதவிகிதம் குறைப்பது, வாரத்துக்குக் குறைந்தது 150 நிமிடம் வேக நடைப்பயிற்சி, வாரத்தில் இரண்டு மூன்று நாள் தசை வலுப்படுத்தும் பயிற்சி ஆகியவை இன்சுலின் செயல்திறனை மேம்படுத்தும். தட்டின் பாதியைக் காய்கறிகளால், கால்பகுதியைப் புரத உணவால், மீதியை அளவான முழுதானியத்தால் நிரப்புங்கள். சர்க்கரைப் பானங்கள், அதிக மைதா, அடிக்கடி சிற்றுண்டி ஆகியவற்றைத் தவிருங்கள். தினமும் ஏழு முதல் எட்டு மணி நேரத் தூக்கம், மனஅழுத்தக் கட்டுப்பாடு, இடையிடையே எழுந்து நடப்பது ஆகியவையும் சமமாக முக்கியம். சிறிய மாற்றங்கள், நீண்டகாலத்தில் பெரிய பாதுகாப்பைத் தரும்.

 

இரவு உணவின் ரகசியம்!

இரவு உணவை உறங்குவதற்குக் குறைந்தது மூன்று மணி நேரம் முன்பே முடித்துவிடுங்கள். இரவு நேரச் சிற்றுண்டியைத் தவிர்த்து, தினமும் சுமார் 12 மணி நேர இரவு இடைவெளியைப் (உதாரணமாக இரவு 7 மணி முதல் காலை 7 மணி வரை) பின்பற்றுவது, உடலின் இயற்கை உயிர்க்கடிகாரத்துடன் உணவு நேரத்தை ஒத்திசைக்கிறது. இது சிலருக்கு உடல் எடை, இன்சுலின் உணர்திறன், சர்க்கரைக் கட்டுப்பாடு ஆகியவற்றில் உதவலாம். ஆனால், உணவின் தரத்தையும் அளவையும் மாற்றாமல் இடைவேளை நோன்பு மட்டும் போதாது. இன்சுலின் மருந்து எடுப்போர், கர்ப்பிணிகள், பாலூட்டும் தாய்மார்கள், குழந்தைகள், முதியோர் மருத்துவர் ஆலோசனையின்றி இதை மேற்கொள்ள வேண்டாம்.

 

Dr. இவான் ஏ. ஜோன்ஸ், MBBS, MD[10]
பொது மருத்துவ நிபுணர்
காவேரி மருத்துவமனை – திருச்சி[11]

 

Kauvery Hospital is globally known for its multidisciplinary services at all its Centers of Excellence, and for its comprehensive, Avant-Grade technology, especially in diagnostics and remedial care in heart diseases, transplantation, vascular and neurosciences medicine. Located in the heart of Trichy (Tennur, Royal Road and Alexandria Road (Cantonment), Chennai (Alwarpet, Radial Road & Vadapalani), Hosur, Salem, Tirunelveli and Bengaluru, the hospital also renders adult and paediatric trauma care.

Chennai Alwarpet – 044 4000 6000 • Chennai Radial Road – 044 6111 6111 • Chennai Vadapalani – 044 4000 6000 • Trichy – Cantonment – 0431 4077777 • Trichy – Heartcity – 0431 4077777 • Trichy – Tennur – 0431 4022555 • Maa Kauvery Trichy – 0431 4077777 • Kauvery Cancer Institute, Trichy – 0431 4077777 • Hosur – 04344 272727 • Salem – 0427 2677777 • Tirunelveli – 0462 4006000 • Bengaluru – 080 6801 68011

 

Endnotes:
  1. ரத்தச் சர்க்கரை சாதாரணமாகத் தோன்றினாலும், அதைக் கட்டுக்குள் வைக்க உங்கள் கணையம் அதிக இன்சுலினைச் சுரந்து ஓய்வின்றி உழைத்துக்கொண்டிருக்கலாம்: https://www.kauveryhospital.com/blog/family-and-general-medicine/healthy-ways-of-lowering-your-blood-sugar/
  2. உடல் பருமன்: https://www.kauveryhospital.com/blog/vaazhga-nalamudan/do-not-be-negligent/
  3. பெண்களின் பாலிசிஸ்டிக் ஓவரி சிண்ட்ரோம் (PCOS): https://www.kauveryhospital.com/blog/obstetrics-and-gynecology/pcos-all-you-need-to-know-to-conquer-it/
  4. கொழுப்புக் கல்லீரல்: https://www.kauveryhospital.com/blog/liver-diseases/fatty-liver-disease/
  5. நடைப்பயிற்சியும் நீரிழிவும் உயர் ரத்த அழுத்தமும்: https://www.kauveryhospital.com/blog/vaazhga-nalamudan/walking-and-diabetes-and-high-blood-pressure/
  6. பெண்களுக்கு மாதவிடாய் முறைகேடு: https://www.kauveryhospital.com/blog/obstetrics-and-gynecology/when-to-worry-about-irregular-periods/
  7. வகை 2 நீரிழிவு: https://www.kauveryhospital.com/blog/family-and-general-medicine/type-2-diabetes-and-intermittent-fasting-pros-and-cons/
  8. உயர் ரத்த அழுத்தம்: https://www.kauveryhospital.com/blog/vaazhga-nalamudan/high-blood-pressure/
  9. HbA1c: https://www.kauveryhospital.com/blog/vaazhga-nalamudan/hba1c-test-helpful-for-diabetics/
  10. Dr. இவான் ஏ. ஜோன்ஸ், MBBS, MD: https://www.kauveryhospital.com/doctors/trichy-tennur/general-medicine/dr-ivan-a-jones/
  11. காவேரி மருத்துவமனை – திருச்சி: https://www.kauveryhospital.com/our-locations/trichy-tennur/

Source URL: https://www.kauveryhospital.com/blog/vaazhga-nalamudan/blood-sugar-levels-are-normal-but-stay-alert/

Copyright ©2026 Kauvery Blog unless otherwise noted.