பக்கவாதத்தை வெல்லும் தருணம்!

by admin-blog-kh | October 7, 2025 6:06 am

பக்கவாதம் என்பது மூளையின் மாரடைப்பு! இந்தியாவில் ஆண்டுக்கு 18 லட்சம் பேருக்கு பக்கவாதம் ஏற்படுகிறது. BE FAST[1] அறிகுறிகளை அறிந்து நான்கரை  மணி நேரத்துக்குள் சிகிச்சை பெற்றால் முழு குணம் பெற முடியும்.

பக்கவாதம் என்றால் என்ன?[2] 

பக்கவாதம் (ஸ்ட்ரோக்) என்பது மூளைக்கு ரத்த ஓட்டம் திடீரென குறைவதால் ஏற்படும் அபாயகரமான நிலை. ஆக்ஸிஜன் இல்லாமல் மூளை செல்கள் சில நிமிடங்களிலேயே இறக்கத் தொடங்கும். இதன் காரணமாக உடலின் ஒரு பக்கம் செயலிழப்பு, பேச்சு குளறல், வாய் கோணல், நடக்கும்போது தள்ளாடுதல், தலைசுற்றல், ஒரு கண்ணில் பார்வை இழப்பு போன்ற பிரச்னைகள் ஏற்படும்.

பக்கவாதத்தின் வகைகள்[3] 

பக்கவாதம் இரண்டு வகைப்படும். முதலாவது இஸ்கெமிக் பக்கவாதம்[4] (85%). இது ரத்தக்குழாய் அடைப்பால் மூளைக்கு ரத்த ஓட்டம் குறைவதால் ஏற்படுகிறது. இரண்டாவது ஹெமரேஜிக் பக்கவாதம்.  இது மூளையில் ரத்தக்கசிவு ஏற்படுவதால் நிகழ்கிறது.

BE FAST – உயிர்காக்கும் எழுத்துகள்

பக்கவாதத்தை ஆரம்பத்திலேயே கண்டறிய BE FAST என்கிற நினைவுக் குறிப்பை பயன்படுத்தலாம்.

B – Balance (சமநிலை): திடீர் தள்ளாடுதல் அல்லது விழுதல்

E – Eye sight (கண் பார்வை): ஒரு கண்ணில் பார்வை இழப்பு அல்லது இரட்டைப் பார்வை

F – Face drooping (முக கோணல்): முகத்தின் ஒரு பக்கம் தொங்குதல்

A – Arm droop (கை தொங்கல்): ஒரு கையை தூக்க முடியாமை

S – Speech difficulty (பேச்சுக் குளறல்): பேச்சு தெளிவின்மை அல்லது பேச முடியாமை

T – Time (நேரம்): உடனே மருத்துவ உதவி பெறுங்கள்

ஆபத்துக் காரணிகள் 

மாற்ற முடியாத காரணிகள்: வயது, பாலினம், மரபியல். மாற்றக்கூடிய காரணிகள்: உடல் பருமன்[5], உயர் ரத்த அழுத்தம், நீரிழிவு[6], கொலஸ்ட்ரால் அதிகரிப்பு, புகைபிடித்தல், மதுபானம், மன அழுத்தம், தூக்கமின்மை, சமச்சீரான உணவின்மை.

தடுப்பு முறைகள் 

• வழக்கமான மருத்துவப் பரிசோதனை மூலம் ரத்த அழுத்தம், சர்க்கரை, கொலஸ்ட்ராலைக் கட்டுப்பாட்டில் வைக்க வேண்டும். உயர் ரத்த அழுத்தமும் நீரிழிவுக் குறைபாடும் ரத்தக்குழாய்களைச் சேதப்படுத்தும்.
• வாரத்துக்கு 150 நிமிடம் மிதமான உடற்பயிற்சி அல்லது வேகமான நடைப்பயிற்சி செய்து ஆரோக்கியமான எடையைப் பராமரிக்க வேண்டும்.
• பழங்கள், காய்கறிகள், முழு தானியங்கள், நல்ல புரதம் நிறைந்த உணவு எடுத்துக்கொள்ள வேண்டும். அதே நேரத்தில் நிறைவுற்ற கொழுப்பு மற்றும் உப்பு குறைவான உணவு சாப்பிட வேண்டும்.
• இரவில் 7-8 மணி நேரம் ஆழ்ந்த தூக்கம், யோகா அல்லது தியானம் மூலம் மன அழுத்தத்தை[8] குறைக்க வேண்டும்.
• புகைபிடித்தல் மற்றும் அதிகமான மதுபானம் அருந்துவதை நிறுத்த வேண்டும்.

சிகிச்சை முறைகள் 

ஒவ்வொரு நிமிடமும் முக்கியம். மூளைக்கு ரத்த ஓட்டம் குறையும் ஒவ்வொரு நிமிடத்திலும் கோடிக்கணக்கான நியூரான்கள் அழிகின்றன. மூளை ஸ்கேன் மூலம் உறுதி செய்யப்பட்ட இஸ்கெமிக் பக்கவாதத்துக்கு, 4.5 மணி நேரத்துக்குள்[9] டிஸ்யூ பிளாஸ்மினோஜன் ஆக்டிவேட்டர் (tPA) என்ற கட்டியை கரைக்கும் மருந்து கொடுத்தால் மூளைக்கு ரத்த ஓட்டத்தை மீட்டெடுக்க முடியும். சில நேரங்களில் இந்த மருந்து பலனளிக்காதபோது அல்லது சில நோயாளிகளுக்கு ஏற்றதாக இல்லாதபோது, மருத்துவர்கள் மெக்கானிக்கல் த்ரம்பெக்டமி என்ற குறைந்த வலி தரும் அறுவை சிகிச்சை மூலம் மூளையிலிருந்து ரத்தக்கட்டியை அகற்றலாம்.

பக்கவாதத்தை ஆரம்பத்திலேயே கண்டறிந்து சிகிச்சை[10] பெற்றால் சிறந்த முடிவும் உயிர் பிழைப்பும் கிடைக்கும். எனவே, பக்கவாதத்தைக் கண்டறிந்து CT/MRI ஸ்கேன் வசதி உள்ள அருகிலுள்ள ஸ்ட்ரோக் மையத்தை அடைய வேகமாகச் செயல்படுங்கள்.

ஹெமரேஜிக் பக்கவாதத்துக்கு சிகிச்சைமுறை வேறுபடும். அதனால்தான் இமேஜிங் வசதிகள் தேவை. ரத்த அழுத்த மேலாண்மை மற்றும் சுவாசம், ரத்த ஓட்டம் போன்ற முக்கிய உயிர் அறிகுறிகளை நிலைப்படுத்தல் அவசியம். சில நேரங்களில் அதிக ரத்தக்கசிவு காரணமாக மூளை அழுத்தம் ஏற்பட்டால் அறுவை சிகிச்சை தேவைப்படலாம்.

இரண்டாவது பக்கவாதத்தைத் தடுக்க வழக்கமான மருந்துகள் மற்றும் மருத்துவப் பரிசோதனைகளை மருத்துவர் ஆலோசனைப்படி எடுத்துக்கொள்ள வேண்டும்.

பக்கவாதம் ஒரு கடுமையான மருத்துவ அவசரநிலை.[11] ஆரோக்கியமான வாழ்க்கைமுறையைப் பின்பற்றி, மருத்துவ நிலைமைகளை நிர்வகித்து, ஆரம்ப அறிகுறிகளை அடையாளம் கண்டு, நாம் பக்கவாதத்தின் அழிவுகரமான விளைவுகளைக் கணிசமாக குறைக்க முடியும். இந்த விழிப்புணர்வைப் பரப்பி பக்கவாதத்தை வெல்ல நாம் அனைவரும் ஒன்றிணைந்து செயல்படுவோம்.

 

 

Dr. திவ்யா செல்வராஜ்[12]
MD (Paediatrics), D.M (Neurology)நரம்பியல் சிறப்பு மருத்துவர்
காவேரி மருத்துவமனை[13]
சேலம்

 

Kauvery Hospital is globally known for its multidisciplinary services at all its Centers of Excellence, and for its comprehensive, Avant-Grade technology, especially in diagnostics and remedial care in heart diseases, transplantation, vascular and neurosciences medicine. Located in the heart of Trichy (Tennur, Royal Road and Alexandria Road (Cantonment), Chennai (Alwarpet, Vadapalani & Radial Road), Hosur, Salem, Tirunelveli and Bengaluru, the hospital also renders adult and paediatric trauma care.

Chennai Alwarpet – 044 4000 6000 • Chennai Vadapalani – 044 4000 6000 • Chennai Radial Road – 044 40504050 • Trichy – Cantonment – 0431 4077777 • Trichy – Heartcity – 0431 4077777 • Trichy – Tennur – 0431 4022555 • Maa Kauvery Trichy – 0431 4077777 • Kauvery Cancer Institute, Trichy – 0431 4077777 • Hosur – 04344 272727 • Salem – 0427 2677777 • Tirunelveli – 0462 4006000 • Bengaluru – 080 6801 68011

Source URL: https://www.kauveryhospital.com/blog/vaazhga-nalamudan/the-moment-to-overcome-paralysis/

---