வயிறு நிரம்ப சாப்பிட்ட பிறகு நெஞ்சில் ஏற்படும் அசௌகரியமான எரிச்சல் உணர்வை நம்மில் பெரும்பாலோர் அனுபவித்திருப்போம். இதை நெஞ்செரிச்சல் அல்லது அமிலப் பின்னோட்டம் (ஆஸிட் ரிஃப்ளக்ஸ்) என்று சொல்வோம்.
பலருக்கு, இது எப்போதாவது ஏற்படும், பிறகு தானாகவே சரியாகிவிடும் என்பதால் இதை ஒரு சாதாரணப் பிரச்சனையாக நினைத்து இதை எளிதாகப் புறக்கணித்து விடுவார்கள். ஆனால், ஒருவருக்கு மீண்டும் மீண்டும் அமிலப் பின்னோட்டம் ஏற்படும் போது, அது கண்டிப்பாக கவனிக்கப்பட வேண்டும். அடிக்கடி ஏற்படும் அமிலப் பின்னோட்டத்தை நீண்ட காலமாகப் புறக்கணிப்பது, உணவுக் குழாயைச் சேதப்படுத்தக்கூடும் என்பது மட்டுமல்லாமல் மேலும் கடுமையான சிக்கல்களுக்கும் அது வழிவகுக்கலாம்.
நாம் உண்ணும் உணவு உணவுக்குழாய் மூலம் நம் வாயிலிருந்து வயிற்றுக்குள் கொண்டு செல்லப்படுகிறது. வயிற்றில் உள்ள உணவுகள், வயிற்று அமிலம் உட்பட, அந்த உணவுக்குழாயினுள் மீண்டும் மேலே எழும்பி வருவதை அமிலப் பின்னோட்டம் என்போம்.
பொதுவாக, உணவுக்குழாயின் அடிப்பகுதியில் உள்ள ஒரு தசையானது, ஒரு வால்வு போலச் செயல்பட்டு, உணவை வயிற்றுக்குள் செலுத்தும், ஆனால் அது மீண்டும் மேலெழும்பி வருவதைத் தடுக்கும். இந்த வால்வு சரியாக மூடாமல் போகும் போது, வயிற்று அமிலம் மேல்நோக்கிப் பயணித்து, உணவுக்குழாயின் உள்சுவற்றில் எரிச்சலை உண்டாக்கும்.
இதன் விளைவாக பின்வரும் அறிகுறிகள் ஏற்படலாம்:
எப்போதாவது நெஞ்செரிச்சல் ஏற்படுவது சகஜம் என்றாலும், இந்த அறிகுறிகள் அடிக்கடி ஏற்படும்போதோ அல்லது அவற்றைக் கட்டுப்படுத்துவது கடினமாகும் போதோ தான் பிரச்சினை எழுகிறது.
இரைப்பையானது அமிலத்தினால் மீண்டும் மீண்டும் தாக்கப்பட்டால், உணவுக்குழாயின் கீழ்ப்பகுதியைச் சுற்றியுள்ள செல்களில் மாற்றங்கள் ஏற்படலாம். அப்போது பாரெட்ஸ் உணவுக்குழாய் என்ற நிலை ஏற்படுகிறது, இது உணவுக்குழாய் புற்றுநோய்க்கான அபாயத்தை அதிகரிக்கக்கூடும்.
சிலருக்கு, இரவில் அறிகுறிகள் மோசமடைகின்றன. படுத்துக் கொள்ளும் நிலையில் வயிற்றிலுள்ள உணவு உணவுக்குழாயை நோக்கி எளிதில் மேலே எழும்பும். இரவு நேரத்தில் தொடர்ச்சியாக நெஞ்செரிச்சல் ஏற்பட்டால் அது தூக்கத்தைக் கெடுத்து, அடுத்த நாள் உங்களுக்கு சோர்வையும் அசௌகரியத்தையும் ஏற்படுத்தும்.
இதைச் சமாளிக்க நீங்கள் சில உணவுகளைத் தவிர்க்க வேண்டியிருக்கலாம், குறைவாக சாப்பிட வேண்டியிருக்கலாம் அல்லது அடுத்து எப்போது நெஞ்செரிச்சல் ஏற்படுமோ என்ற பயம் தோன்றலாம். காலப்போக்கில், இது உங்கள் அன்றாட வாழ்வின் ஒரு அங்கமாக மாறி வெறுப்பை உண்டாக்கலாம்.
அமிலப் பின்னோட்டத்தை மோசமாக்கும் சில பழக்கவழக்கங்கள் மற்றும் உணவு வகைகள் உள்ளன.
அளவுக்கதிகமாக உணவு உண்பது, சாப்பிட்ட உடனே படுக்க அல்லது உறங்கச் செல்வது, அதிகமான உடல் எடை, மற்றும் புகைப்பிடித்தல் போன்றவை அமிலப் பின்னோட்டத்தை மோசமாக்கும் சில பழக்கவழக்கங்கள் ஆகும்.
காரமான அல்லது கொழுப்பு நிறைந்த உணவுகள், சாக்லேட், காபி, மதுபானம் அல்லது அமில உணவுகள் போன்றவை அமிலப் பின்னோட்டத்தை மோசமாக்கும் உணவுகளாகும்.
உங்களுக்கு தூண்டுதலாக உள்ள பழக்கவழக்கம் மற்றும் உணவு என்ன என்பதைக் கண்டறிந்து அதில் கவனம் செலுத்தி, அவற்றைத் தவிர்ப்பது நலம்.
பின்வரும் வகையில் சில எளிய மாற்றங்களைச் செய்தால் உங்களுக்கு உதவியாக இருக்கலாம்:
உங்களுக்கு தொடர்ந்து நெஞ்செரிச்சல் அல்லது அமிலப் பின்னூட்டம் ஏற்பட்டால், மருத்துவ ஆலோசனை பெறாமல் நீங்களாகவே அதற்கு சிகிச்சை எடுத்துக் கொள்ளாதீர்கள். உங்களுக்கு அடிக்கடி நெஞ்செரிச்சல் ஏற்பட்டாலோ, அல்லது உங்கள் தூக்கம் மற்றும் அன்றாடச் செயல்பாடுகளில் இடையூறு செய்தாலோ, உடனடியாக ஒரு மருத்துவரை அணுகவும்.
விழுங்குவதில் சிரமம், வலிமிகுந்த விழுங்கல், காரணமற்ற எடை இழப்பு, தொடர்ச்சியான வாந்தி அல்லது பிற அசாதாரண அறிகுறிகள் போன்றவை இருந்தாலும் நீங்கள் மருத்துவ ஆலோசனையைப் பெற வேண்டும்.
நீங்கள் மற்றொரு முக்கியமான எச்சரிக்கையையும் நினைவில் வைத்துக் கொள்ள வேண்டும்: எல்லா நெஞ்செரிச்சல் உணர்வும் அமிலப் பின்னோட்டத்தால் ஏற்படுவதாக நினைக்கக்கூடாது.
உங்களுக்கு ஏற்படும் திடீர் அல்லது கடுமையான நெஞ்சு வலி, குறிப்பாக அதனுடன் மூச்சுத்திணறல், வியர்வை, தலைச்சுற்றல், குமட்டல் அல்லது உங்கள் கை, தாடை, முதுகு அல்லது தோள்பட்டைக்கு வலி பரவினால், அவசர மருத்துவ உதவியை நாடுங்கள். இதயப் பிரச்சனைகளுக்கான அறிகுறிகளும் சில சமயங்களில் நெஞ்செரிச்சலைப் போலவே காணப்படலாம்.
நெஞ்செரிச்சல் அல்லது அமிலப் பின்னூட்டம் என்பது நீங்கள் சகித்துக்கொள்ள வேண்டிய விஷயம் அல்ல!
எப்போதாவது ஏற்படும் அமிலப் பின்னோட்டம் கவலைக்குரிய விஷயம் அல்ல. ஆனால், அடிக்கடி அல்லது தொடர்ச்சியாக ஏற்பட்டால் அது உடனடியாக கவனிக்கப்பட வேண்டும்.
எந்த ஒரு உடல்நலப் பிரச்சனையும் தீவிரமடைவதற்கு முன்பு, பெரும்பாலும் எச்சரிக்கை அறிகுறிகள் தோன்றும். அவற்றை புறக்கணிக்க வேண்டாம்; உடனடி நிவாரணம் பெறுவதற்காக நீங்களாகவே மருந்துக் கடையில் மருந்துகளை வாங்கி எடுத்துக் கொள்ள வேண்டாம். மாறாக, அது தொடர்ந்து ஏற்படுவதற்கான காரணத்தை கண்டறிய முயலுங்கள். மருத்துவரை நாடி தகுந்த சிகிச்சை பெறுங்கள்.
சில பொருத்தமான வாழ்க்கைமுறை மாற்றங்கள், மருத்துவ ஆலோசனை மற்றும் சிகிச்சை ஆகியவற்றின் மூலம், நாம் அமிலப் பின்னோட்டத்தை பெரும்பாலும் திறம்படக் கட்டுப்படுத்த முடியும்.
