ஒவ்வொரு 5 நிமிடத்துக்கும் ஒருமுறை சர்க்கரை அளவைத் தானாகவே அளக்கும் CGM தொழில்நுட்பம், விரல்குத்து பரிசோதனையில் (Finger Prick Test) தவறவிடும் இரவு நேரக் குறைவு, உணவுக்குப் பிந்தைய உயர்வு, திடீர் மாற்றங்களை கண்டறிந்து எச்சரிக்கை அளிக்கிறது. நீரிழிவுக் கட்டுப்பாட்டில் புரட்சிகர மாற்றம் இது!
தினமும் பலமுறை விரல்களைக் குத்தி, அப்போது வெளிப்படும் ரத்தத் துளிகளில் சர்க்கரை அளவைச் சரிபார்த்துக் களைத்துப் போய்விட்டீர்களா? தொடர் குளுக்கோஸ் கண்காணிப்பு தொழில்நுட்பம் இந்தப் பிரச்னைக்கான புதிய தீர்வு! சிறிய சென்சார் ஒன்று தோலுக்கு அடியில் பொருத்தப்பட்டு, 24 மணி நேரமும் தானாகவே சர்க்கரை அளவைக் கண்காணிக்கிறது. வலியில்லாத, துல்லியமான இந்தத் தொழில்நுட்பம் இப்போது இந்தியாவிலும் எளிதாகக் கிடைக்கிறது.
மூன்று பகுதிகள்: சென்சார் (கை அல்லது வயிற்றில் வைக்கப்படும் சிறிய இழை), டிரான்ஸ்மிட்டர் (வயர்லெஸ் முறையில் தகவல் அனுப்புகிறது), மொபைல் செயலி (சர்க்கரை எண்கள், வரைபடங்கள் காட்டுகிறது). சென்சார் ஒவ்வொரு 1-5 நிமிடத்துக்கும் ஒருமுறை குளுக்கோஸ் அளவைச் சரிபார்த்து உங்கள் தொலைபேசிக்கு அனுப்புகிறது. இவ்வாறு தூக்கம், உடற்பயிற்சி, உணவு நேரங்களிலும் தொடர்ந்து கண்காணிப்பு கிடைக்கிறது.
இது அளிக்கும் உடனடி எச்சரிக்கைகள்தான் மிகப்பெரிய பலம். சர்க்கரை குறைகிறதா, அதிகரிக்கிறதா என்பதை முன்கூட்டியே தெரிவிக்கிறது. குறிப்பாக, இரவில் தூங்கும்போது ஏற்படும் ஆபத்தான குறைவைக் கண்டறிய உதவுகிறது. விரல்குத்து முறையால் இதை அறிவது கிட்டத்தட்ட சாத்தியமில்லை. மேலும், உணவுக்குப் பின் திடீர் உயர்வு, உடற்பயிற்சியால் ஏற்படும் குறைவு, மன அழுத்தத்தால் ஏற்படும் உயர்வு போன்ற மறைந்த மாற்றங்களையும் கண்டறியும். இந்தத் தகவல்கள் சரியான இன்சுலின் அளவு மற்றும் உணவு முடிவுகள் எடுக்க உதவுகின்றன.
டைப் 1 நீரிழிவு உள்ள அனைவருக்கும் இது மிகவும் அவசியம். டைப் 2 நீரிழிவு நோயாளிகளில், தினமும் பல முறை இன்சுலின் ஊசி போடுபவர்கள், அடிக்கடி சர்க்கரை குறைவு ஏற்படுபவர்கள், கட்டுப்படுத்த முடியாத சர்க்கரைப் பிரச்னை உள்ளவர்கள், கர்ப்பிணிகள், குழந்தைகள், வயதானவர்கள் – இவர்களுக்கும் இது மிகுந்த பலனளிக்கும். இன்சுலின் எடுக்காத டைப் 2 நோயாளிகளும் சில மாதங்களுக்கு ஒருமுறை இதைப் பயன்படுத்தி தங்கள் சர்க்கரைப் போக்குகளைப் புரிந்துகொள்ளலாம்.
நவீன சாதனங்கள் (டெக்ஸ்காம், ப்ரீஸ்டைல் லிப்ரே) ரத்தச் சர்க்கரையின் 10-15 சதவிகிதத்துக்குள் துல்லியமாக அளவிடுகின்றன. புதிய சென்சார் வைத்த முதல் நாள், சர்க்கரை மிக விரைவாக மாறும்போது சிறிய தாமதம் இருக்கலாம். அறிகுறிகள் சாதனம் காட்டும் எண்ணுடன் பொருந்தாதபோது அல்லது மிகக் குறைவான அளவுகளை உறுதிப்படுத்த விரல்குத்து தேவைப்படலாம். ஆனால், தினசரி கட்டுப்பாட்டுக்கு இது மிக நம்பகமானது.
ப்ரீஸ்டைல் லிப்ரே சென்சார் (14 நாட்கள்) ₹3,500 முதல் ₹5,500 வரை, டெக்ஸ்காம் (10 நாட்கள்) ₹4,000 முதல் ₹5,000 வரை கிடைக்கிறது. டைப் 2 நோயாளிகள் 3 மாதத்துக்கு ஒருமுறை இடைவெளி விட்டு பயன்படுத்தினாலே போதுமானது. சில தனியார் காப்பீட்டு நிறுவனங்கள் இப்போது செலவில் ஒரு பகுதியைத் திருப்பிச் செலுத்துகின்றன.
சென்சார் வைக்கும் முறையை மருத்துவர் அல்லது நீரிழிவுக் கல்வியாளர் கற்றுத்தர வேண்டும். போக்கு அம்புகுறிகளின் அர்த்தத்தையும், உயர்/தாழ் எச்சரிக்கைகளை எவ்வாறு அமைப்பது என்பதையும் நன்றாகப் புரிந்துகொள்ள வேண்டும். ‘டைம் இன் ரேஞ்ச்’ என்கிற புள்ளிவிவரம் மிக முக்கியம். உங்கள் சர்க்கரை எவ்வளவு நேரம் சரியான அளவில் இருக்கிறது என்பதை இது காட்டுகிறது. இந்தத் தகவல்களை வழக்கமாக மருத்துவருடன் பகிர்ந்துகொண்டால், இன்சுலின் அளவையும் மருந்துகளையும் சரியாக சரிசெய்ய உதவும்.
தொடர் குளுக்கோஸ் கண்காணிப்பு கருவி விரல்குத்தை முழுமையாக மாற்றாது. ஆனால், நீரிழிவுக் கட்டுப்பாட்டை எளிமையாக்கி, பாதுகாப்பாக்கி, நோயாளிக்கு அதிகாரமளிக்கும் சக்திவாய்ந்த கருவி இது. மருத்துவர் வழிகாட்டுதலுடன் பயன்படுத்தினால், சிறந்த நீரிழிவுக் கட்டுப்பாடு சாத்தியமே!
விரல்குத்து பரிசோதனை • ஒரு நேரத்தில் ஒரு அளவீடு மட்டும் வலி உள்ளது • இரவு நேர மாற்றங்கள் தெரியாது • திடீர் ஏற்ற இறக்கங்கள் தவறவிடப்படும்
CGM அமைப்பு • ஒவ்வொரு 5 நிமிடத்துக்கும் அளவீடு • வலியில்லாதது • 24/7 கண்காணிப்பு • போக்குகள் மற்றும் எச்சரிக்கைகளையும் அளிக்கும்
• இரவு நேர ஹைப்போ கண்டறிதல் (உயிர் காக்கும்) • உணவுக்குப் பிந்தைய உயர்வு கண்காணிப்பு • உடற்பயிற்சியின் தாக்கம் புரிதல் • மன அழுத்தம், நோய் விளைவுகளைக் காணுதல் • இன்சுலின் அளவு சரிசெய்தல் • குழந்தைகள், வயதானவர்களுக்குப் பாதுகாப்பு • விரல்குத்து வலி இல்லை
• அனைத்து டைப் 1 நீரிழிவு நோயாளிகள் • தினமும் பல முறை இன்சுலின் ஊசி எடுப்பவர்கள் • அடிக்கடி ஹைப்போ வருபவர்கள் • கட்டுப்படாத சர்க்கரை (HbA1c > 8%) • நீரிழிவுக் குறைபாடு உள்ள கர்ப்பிணிகள் • குழந்தைகள் மற்றும் பதின்வயதினர் • வயதானவர்கள் (தனியாக வாழ்பவர்கள்)
• Time in Range (TIR): 70-180 mg/dL அளவில் எவ்வளவு நேரம் இலக்கு: > 70% நேரம் • Time Below Range (TBR): < 70 mg/dL இலக்கு: < 4% நேரம் • Time Above Range (TAR): > 180 mg/dL இலக்கு: < 25% நேரம்
Dr. பி. கௌரி, MBBS, Dip. Diab, PGD.Cardio, PGD. ECHO, MSC (Psychology), நீரிழிவு சிகிச்சை நிபுணர் காவேரி மருத்துவமனை, திருச்சி – கண்டோன்மென்ட்
Kauvery Hospital is globally known for its multidisciplinary services at all its Centers of Excellence, and for its comprehensive, Avant-Grade technology, especially in diagnostics and remedial care in heart diseases, transplantation, vascular and neurosciences medicine. Located in the heart of Trichy (Tennur, Royal Road and Alexandria Road (Cantonment), Chennai (Alwarpet, Radial Road & Vadapalani), Hosur, Salem, Tirunelveli and Bengaluru, the hospital also renders adult and paediatric trauma care.
Chennai Alwarpet – 044 4000 6000 • Chennai Radial Road – 044 6111 6111 • Chennai Vadapalani – 044 4000 6000 • Trichy – Cantonment – 0431 4077777 • Trichy – Heartcity – 0431 4077777 • Trichy – Tennur – 0431 4022555 • Maa Kauvery Trichy – 0431 4077777 • Kauvery Cancer Institute, Trichy – 0431 4077777 • Hosur – 04344 272727 • Salem – 0427 2677777 • Tirunelveli – 0462 4006000 • Bengaluru – 080 6801 68011
